మరణించిన ఆర్టీసీ కుటుంబానికి ఒకరికి ఉద్యోగం:: ఆర్టిసీ ఎండి సజ్జనార్.

హైదరాబాద్ బ్యూరో, తెలంగాణ వార్త: ఎట్టకేలకు టీఎస్ ఆర్టీసీలో కారుణ్య నియామకాలకు గ్రీన్ సిగ్నల్ లభించింది. మరణించిన ఆర్టీసీ సిబ్బంది కుటుంబంలో అర్హులైన ఒకరికి ఉద్యోగం ఇచ్చేలా టీఎస్ఆర్టీసీ ఎండీ సజ్జనార్ సర్క్యులర్ జారీ చేశారు
బ్రెడ్ విన్నర్స్ స్కీమ్’ పేరిట సజ్జనార్ ఈ సర్క్యులర్‌ను ట్విట్టర్లో పోస్టు చేశారు.

ఉద్యోగి మరణించిన తేదీ ఆధారంగా సీనియారిటీని అనుసరించి కారుణ్య నియామకాలు చేపట్టనున్నట్లు తెలిపారు. ఉద్యోగి కుటుంబ సభ్యుల అర్హతలను అనుసరించి డ్రైవర్‌ గ్రేడ్ – 2, కండక్టర్‌ గ్రేడ్‌-2, ఆర్టీసీ కానిస్టేబుల్‌, శ్రామిక్‌ పోస్టులను భర్తీ చేయనున్నారు. డ్రైవర్లకు రూ.19వేలు, కండక్టర్లకు రూ.17వేలు, ఆర్టీసీ కానిస్టేబుళ్లు, శ్రామిక్‌లకు రూ.15 వేల చొప్పున జీతాలు ఇవ్వనున్నారు.

కారుణ్య నియామకాలు పొందిన సిబ్బంది మూడేళ్ల పనితీరు ఆధారంగా వారిని రెగ్యులర్‌ చేయనున్నారు. పర్ఫార్మెన్స్‌ అసెస్‌మెంట్‌ టెస్ట్‌ నిర్వహించి అందులో 60 శాతం మార్కులు సాధించడంతో పాటు, ప్రతి ఏడాది 240 రోజులు పని చేసిన వారు, ప్రయాణికులతో వారి ప్రవర్తనను ఆధారంగా చేసుకొని రెగ్యులరైజ్‌ చేయనున్నామని తెలిపారు.